Se muestran los artículos pertenecientes a Mayo de 2008.
Resumen
- 14/05/2008 21:27 - Na bolera
- 17/05/2008 10:13 - El burbús de la tristura
- 29/05/2008 20:11 - A la gueta la esperanza.
14/05/2008
Na bolera
De reflundión
sonó'l sonsón,
gaita grillera
gargolexera,
trocolotró,
na primavera,
canten los bolos
el son sogón.
17/05/2008
El burbús de la tristura
Polos llabios tarazaos de la muga.
Pola nueche esperteyada a cuspiataes.
Por nortiate na llexura
de lluces amatagaes...
Cola murnia los umeros.
Cola andecha los merucos.
Cola patria nes coraes
y les vidayes frayaes
por milenta años de buxos...
Nel burbús de la tristura.
Na solombra de los ferres.
Na borrina y los cabuxos
plumio versos y espatuxos
pente rises bixorderes
y mortayes de gafura...
Güei a ti, pola roxura
d’adicate ente escaezos,
abeyando na mio vida
el secañu los camientos,
pídote que, a lo postrero,
alites de lo bisiego
glayando la to ferida
pente capones y muertos.
29/05/2008
A la gueta la esperanza.
Nacisti pa ser palaciu
y véote posafuelles;
enlluxáronte somantu,
riscares y tapeceres.
Nalando vas al debalu
pente llamuergues y lleres;
arrincáronte'l carbayu,
matáronte les fogueres.
Más endílgase yá l'arniu
de nuevos alboreceres;
tornarás a ser raigañu,
rosada de les camperes.
Esconsona del to suañu,
yá entamaron les andeches;
allugarán ceo'l ramu
los fíos de les tos seches.
.