La verdá que nos fai llibres.

                   Vivimos engañaos desque nacemos

                   y, malpenes estrenamos les neñines,

                   yá nos cambien les mamielles por un chupu.

                   Vivimos namoraos desque podemos

                   y llevamos bien dispuestos en gargüelu

                   un cantar y un ixuxú pa echar al mundu.

                   Filamos tolo fino que sabemos

                   y texemos mil barayes colos años

                   pa evitar que s’esfreza’l pensamientu.

                   Y, a la postre, abangaos d’upar a otros,

                   les mamielles celestiales añoramos

                   espurriendo’l pescuezu nel cagüercu.