El copilotu de Pinín

    Ya, si acasu, la mia Lour, lus sous güechus enturnare,

    mil bigarinas la mar-l.ly unviara a sunsoniare,

    con sele orpín, la seronda'l sou pelu afalagare,

    ya, si acasu, la mia Lour, lus sous güechus surrisare.

                Dichosu'l que morriere de folganza,

                trancáu nun llagar, de sidra fartu,

                pitanza a retorcer y echando un cantu

                al sonsón de la gaita n'axuntanza.

                Dichosu'l que folgare cola panza,

                la dormida y el mingu ensin desmayu,

                sin poner más enfotu nel trabayu

                qu'aselar de les tripes la so danza.

                Qu'esistencia inorante de folixa,

                torna en probe al ricu enfurruñáu

                y asoleya al manguán la poca xixa.

                Y, al final d'esta danza, ye almiráu

                el fartón qu'escosó'l tetu la vida

                y enxamás l'avarientu esgalicháu.

                     Baluarte acorazáu de la inorancia,

                     bufón autoascendíu a emperador,

                     diañucu camudáu n'escribidor,

                     brillante salvapatries... si hai ganancia.

                     Del ripiu campeón a la constancia,

                     del llombu, singular mansuñador,

                     testón y encerriscáu batallador

                     en busca d'un tronucu... na Importancia.

                     ¿Acasu vio, dayuri, güeyu humanu,

                     Merlín de mayor talla intelectual

                     y orguyu nacional pal asturianu?.

                     ¡Desplómome en finoxos, caso en tal,

                     y amusgo estes oreyes d'aldeanu,

                     delantre de tan gran valor moral!.